Во текот на 2021 година, ТЕТРА Битола успешно го проектираше и реализираше еден од своите најсложени инженерски проекти – комплетна изведба и хидротехничко опремување на пумпни станици за одводнување од доток на површински и подземни води во рудниците Брод-Гнеотино и Суводол, дел од енергетскиот комбинат РЕК БИТОЛА. Овој капитален проект опфати набавка, испорака, стручна монтажа и успешно пуштање во активна работа на висококапацитетни потопни муљни пумпи во сериска врска со центрифугални пумпи, интегрирани со потисни GRE цевководи, системи за електрично напојување и напредна автоматика.

Вкупниот обем на работа резултираше со пуштање во функција на три комплексни пумпни агрегати. Во рудникот Брод-Гнеотино се монтирани 2 комплети составени од потопни пумпи TSURUMI Japan (Q=100l/s, H=40m, P=75kW) поставени на специјални пловечки понтони, поврзани во серија со центрифугални пумпи BBA PUMPS Netherlands (Q=100l/s, H=95m, P=160kW). Истите се поврзани со GRE цевководи DN250 PN16 од холандскиот производител FPI-Netherlands во должина од 3.500 метри. За рудникот Суводол е монтиран 1 идентичен комплет, но со посилна центрифугална пумпа BBA PUMPS (P=400kW, H=160m) и GRE цевковод во должина од 1.800 метри.

Комплетната опрема е ставена во функција заедно со трафостаници и електроенергетски ормари опремени со фреквентни регулатори, автоматика и заштитни системи. Со овој проект, ТЕТРА уште еднаш ги потврди своите капацитети за справување со најголемите индустриски предизвици во државата.